Image for post
Image for post

風雨夜歸,決定飛的。開門一瞬間,同司機四目交投,硬係覺得有啲面善。

全港二千八百三十八架綠的,喺云云車海裏面,撞返同一個夜更師傅,殊非易事。瞥見倒後鏡吊住一個「佛」字膠牌,又細佬前細佬後咁嗌,先醒起呢兩三年,因緣際會,大大話話都俾我撞過佢四五次。

「細佬有冇諗住走啊?」

二零二零年,問人移民與否,已經成爲打招呼嘅方式。無人倖免。

「無人想走㗎,但佢要夾你走,唔到你話事。」

第一次搭佢車,仲考緊DSE。一開車,劈頭問我對社會有咩抱負,讀完書想做咩。三年後,另一個時代,另一種方式,問同一條問題。

「而家真係打到埋嚟,細佬,我同你講,要走就趁而家走㗎喇。」

「香港人被佢呃咗廿三年,仲邊有一國兩制?」

「以後香港人無工開㗎喇,上面落來即刻取代你,留地不留人。」

「而家全世界都睇得起香港人,咁有地位,多得呢場運動,咁多手足咁多後生付出。」

BNO就有得走,後生出去打生打死,公平咩?

「我就揸的士嘅,又唔係做銀行寫字樓,無咁多嘢諗,第時去到英國,摘下薯仔,去超市包下生果,就好開心㗎喇。」

時勢之壞,揸的士都要走。

「去英國啊。我仔女都就嚟三十歲咯,老婆又退休,賣埋層樓,有三四百萬移民,仲有六十幾萬退休金都夠慢慢搣囉,呵呵。」

嗯,記得佢講過細仔係末代會考,以前讀友校。

「無㗎喇,而家共產黨要收你皮,唔會同你鬆章,香港玩撚完。」

咁幾時走?

「未咁快,睇埋九月先啦。」

就算九月係點,香港都無得變㗎喎。

「……」

亂世下,健談如你我,相對也無言。有冇眼睇到九月都唔知。

落車嗰陣,佢拍一拍我手背,我又講咗聲保重。而家每次見人,都猶如訣別。再見不知日期,或者,都唔知有冇下次。

一艘綠艇,載到彼岸,終要落車。七百萬人緣來不易,但聽朝打風,而家就係分離嘅時候。

14/6/2020

Get the Medium app

A button that says 'Download on the App Store', and if clicked it will lead you to the iOS App store
A button that says 'Get it on, Google Play', and if clicked it will lead you to the Google Play store