風雨夜歸

風雨夜歸，決定飛的。開門一瞬間，同司機四目交投，硬係覺得有啲面善。

全港二千八百三十八架綠的，喺云云車海裏面，撞返同一個夜更師傅，殊非易事。瞥見倒後鏡吊住一個「佛」字膠牌，又細佬前細佬後咁嗌，先醒起呢兩三年，因緣際會，大大話話都俾我撞過佢四五次。

「細佬有冇諗住走啊？」

二零二零年，問人移民與否，已經成爲打招呼嘅方式。無人倖免。

「無人想走㗎，但佢要夾你走，唔到你話事。」

第一次搭佢車，仲考緊DSE。一開車，劈頭問我對社會有咩抱負，讀完書想做咩。三年後，另一個時代，另一種方式，問同一條問題。

「而家真係打到埋嚟，細佬，我同你講，要走就趁而家走㗎喇。」