無常

約莫一年前，彼時武肺仍未到歐洲，去咗一趟荷蘭探訪舊友。

老友興高采烈，話要介紹一位記者朋友我結識，相約喺酒館等候。

小酌半酣，記者披著雨衣旋風到來，道適才有嘢要寫，踩單車趕至，抱歉要我哋久候。大概風雨勞頓，佢雙目惺忪，素顏略顯倦容。

寒暄一番，老友喚記者作阿藍。又唔知點解講起高達人物，友人同阿藍竟然傾到針鋒相對。老友打圓場，閒聊間話鋒一轉，話不如講下時局，問我哋點睇國族主義。

然後又一輪交鋒，由族群鬥爭講到本土思潮，由民族論講到主權國家。雖然彼此立場迥異，亦不禁佩服阿藍熟書，本土派興衰娓娓道來。

到我講自己經歷，阿藍倏地擘大眼睛，好似發現新訪問對象，提問尖銳起嚟，直搗黃龍，捉住本土派青年嘅思想核心緊咬不放。見識到，記者個腦真係好危險。